Que é Orgullo galego?

Ola! Se estás aquí segue lendo e descubrirás quen somos, cales son os nosos obxectivos e os piares da filosofía de por que facemos o que facemos. Adiante e benvid@!! 

Dunha idea pequena á comunidade en galego máis grande de todo internet.

Dise de xeito sinxelo, coma un resumo improvisado en poucos segundos dunha traxectoria de máis de 3 anos xerando contido, relacións e comunidade.

Primeiro fomos centos, logo fomos milleiros e agora somos decenas de milleiros que día a día falamos, conversamos, debatemos e nos divertimos a través dunhas redes sociais que nos achegan realidades moi separadas entre si.

As veces cun océano de por medio.

Orgullo Galego son todas e todos os galegos orgullosos do seu, da súa terra, da súa lingua, do seu pobo, da súa idiosincrasia e da súa historia ocultada e negada. Das paisaxes, da gastronomía privilexiada, e como somos e pensamos, das nosas tradicións e da nosa mitoloxía.

En resumo, do noso xeito de ver a vida.

Pero tamén somos actualidade, denuncia e reflexión. Altofalante para a difusión de centos de iniciativas sociais, socialización de diferentes inxustizas e espazo aberto e en galego para todas e todos.

Construír rede en galego

Unha das nosas maiores teimas de sempre foi facer este proxecto en galego. É un sinal de identidade inequívoca do que somos e queremos ser.

Queremos aportar o noso grao de area en construír unha rede na que podas ler, falar e escribir en galego. Queremos difundir todo o que é a nosa terra e o que crea o noso pobo na nosa lingua. Porque non sempre é posible facelo así.

190.018

En Facebook. Os máis grandes en galego!

43.600

En Instagram. Tamén os máis grandes 🙂

1.369

En Twitter. Non somos quen de atenderlle :'(

+ 1.750

No boletín semanal. Só faltas ti, dálle!

Pero se está a demostrar que crear contido en galego, contar as nosas historias como as pensamos e transmitimos de xeración en xeración, non é algo limitante. Ben ao contrario, é un potencial inmenso que non estamos sendo quen de aproveitar.

Logo de miles de publicacións en Facebook e Instagram ,somos máis de 230.000 persoas as que as seguimos. Unha auténtica pasada, estamos abrumados polo tamaño da comunidade.
Pero non é suficiente…

O por que do blog

Non queremos frear a posibilidade de seguir fornecendo á comunidade de máis ferramentas para o entretemento e o debate. Non queremos pór barreiras ao campo nin ao mar.

Neste blog trataremos os temas de xeito máis pausado e meticuloso pero sen perder a esencia que nos caracteriza e que tan ben coñecedes das nosas redes sociais.

E o máis importante, isto non será grande sen a túa axuda e compromiso

Porque a comunidade non a facemos os administradores, que deixamos varias horas diariamente creando publicacións e revisando comentarios todo de xeito desinteresado e sen ver un peso, senon que a facedes vós cos vosos comentarios, coas vosas suxestións, co voso compromiso.

Podes axudarnos a continuar co proxecto de moitos xeitos. Bótalles unha ollada.