Que ver en Combarro: a vila dos hórreos, cruceiros e tradicións

Share on facebook
Share on twitter
Share on linkedin
Share on whatsapp
Share on telegram
Share on email

Publicidade

Nas últimas décadas, puidemos observar como parte do patrimonio arquitectónico de moitas vilas mariñeiras foi desaparecendo para dar paso a grandes bloques de vivendas nun proceso de de grandes transformacións urbanas parello á mudanza no modo de vida de milleiros de persoas.

Aínda que esta destrución de parte do noso patrimonio foi importante no conxunto do país, Combarro é un deses lugares que conservou a súa arquitectura tradicional e, aínda que na actualidade corre outros perigos como a masificación turística e a perda da súa identidade o certo é que posibelmente sexa a vila mariñeira que mellor conserve o seu patrimonio.

Imaxe da vila de mariñeiro de Combarro

Onde está Combarro?

Combarro é unha parroquia situada no Concello de Poio, declarada Conxunto Histórico-Artístico e unha das mellores mostras da arquitectura popular galega. Historicamente viviu da pesca, mais na actualidade a actividade principal é o turismo.

Este é un lugar de visita para moitas persoas que van pasar uns días nas Rías Baixas, xa que se atopa moi preto de lugares como Pontevedra ou Sanxenxo.

A maioría da xente adoita complementar a visita a Combarro con outros lugares da zona como son o Mosteiro de Poio, o Mosteiro da Armenteira, os petróglifos da Caeira ou a ruta dos muíños de Samieira.

Que ver en Combarro?

Este lugar mariñeiro constitúe un conxunto etnográfico e patrimonial moi importante, formado principalmente por vivendas mariñeiras datadas dos séculos XVI en diante, máis de sesenta hórreos (ou palleiras como lle chaman en Combarro) e unha importante concentración de cruceiros, un dos principais elementos que atoparás en calquera lugar de Galiza. Ademais, os soportais, as numerosas fontes e o seu chan empedrado tamén os hai que ter en conta polo seu notábel estado de conservación.

Combarro non ten sitios concretos para visitar, todo o seu casco histórico é un museo ao aire libre no que é preciso estar atento para ver cada detalle.

Un dos principais lugares de xuntanza da veciñanza e de celebración de eventos é a Praza do Peirao da Chousa, lugar onde ademais se concentran unha parte importante de restaurantes e terrazas da zona e desde onde podes iniciar a túa visita ao centro histórico.

En canto ás rúas, as dúas principais son a de San Roque e a do Mar, xa que son as que concentran a maior parte das vivendas e hórreos e á súa vez conectan con outras rúas máis pequenas.

Como curiosidade, a orientación dos sete cruceiros non é froito do azar: a maioría dos que teñen a Virxe na cruz teñen orientación cara o mar mentres que os que teñen a imaxe de Cristo están orientados cara a terra.

Publicidade

Publicidade

Cando visitar Combarro?

O certo é que este lugar podes visitalo en calquera momento do ano, mais no verán é cando concentra grandes masas de xente e posibelmente cando sexa máis complicado gozar de todos os seus encantos.

Se non tes máis remedio que vir no verán, recomendamos visitalo a primeira hora da mañá. Mais, se tes a posibilidade de visitalo en calquera época a nosa recomendación é vir a comezos de maio, coincidindo coa mudanza de estación e cando a natureza comeza a florecer.

Na primavera, Combarro está perfecta para visitar xa que non atoparás a masificación doutros meses. Ademais, a súa veciñanza decora portas e balcóns con xestas dando un ambiente aínda máis incríbel.

E por que a xente de Combarro decora así as súas vivendas?

Pois ben, cando chega o mes de maio existe un costume moi arraigado nas Rías Baixas, Norte de Portugal e sur da provincia da Coruña, que consiste en pór xesta nas portas das casas, carros, leiras, embarcacións, fiestras e, nos últimos anos, tamén nos coches.

A tradición di que hai que poñela antes das doce da noite do 1 de maio co obxectivo de protexerse contra o “mal de ollo”, para evitar en definitiva que non poida entrar o mal e que nesas casas non collan o meigallo.

Por exemplo, moi preto de Combarro, na Illa de Ons, teñen unha tradición que consiste en mallar nas dornas con ramallos de xesta, co obxectivo de rachar o meigallo que lles provocaba  dificultades para pescar.

E como podedes ver nestas fotos, a tradición continua en Combarro, decorando a maioría das vivendas de toda a parroquia.

Pode que che interese:

Publicidade

Publicidade

Deixa un comentario

Ti fas que a rede en galego viva!

Ti podes contribuir a que este tipo de contidos e proxectos non desaparezan!

A túa axuda mantén esta páxina, a actualizar as redes sociais, as canles audiovisuais e a crear contido de calidade. Ademais, podes acceder a contido exclusivo para orgullosas e orgullosos do noso!